ليكون مش عاجبك

August 29th, 2006

borghi.gif

سعيد شوفير مسكين في الحكومة، في برغي بكرسي السيارة لاعن تلتميسو… ومش عارف يفكه، راح على قسم الصيانة ولقى أبو خليل فاضي أشغال.

- عالعافية يا أبوخليل..
- الله يعافيك
- والله يا أبو خليل في برغي في كرسي السيارة ذبحني وطلّع بواسير في صرمي.. يا ريت ياخوك تساعدني أشيله.
- على راسي… بس قبل ما اصيب إشي في السيارة.. ياخوك لازم تجيبلي كتاب من مدير قسم الصيانة.. لأنه صراحة أنا ما بحط شي على مسؤليتي.. وانت عارف.. مش ناقصني بهدلة ياخوك.
- ول على شو كتاب يا زلمه… وطب وهذا الكتاب كيف بدي أجيبه..
- ولا يهمك يازلمة.. شغلتها بسيطة.. روح على نادية سكرتيرة المدير.. بتعطيك نسخة من الكتاب.. عبيها وأعطيها إيّها.. بعدين نادية بتوخذها لعند سليم.. سليم بحطها في أجندة إجتماع هيئة الإدراة.. بعدين بناقشوا وظعك.. وبقدموا توصياتهم للجنة المتابعة والتفتيش.. بطلع منهم واحد بعّين على السيارة.. وبرفع كتاب للجنة.. بوافقوا على طلبك وببعتوا الكتاب لمدير قسم الصيانة.. مدير قسم الصيانة بوقع عليه وبعدين بيجبوا الكتاب لعندي.. سعيتها بفكّلك البرغي.
- طب من هون لاهون …
- شو بدك تعمل.. هيك الإجراءات… بعدين إنت ليش بدّك إتفكه.. يازلمه بتقدر ترفع فيه كتاب إطالب بإصابات عمل وتعويض أظرار… بس هادي شغلتها أطول شوي… بس بدّك تتحمل..
- أقولك يا أبو خليل
- قول
-أنا راح أرفع كتاب.. يحللي المشكلة بلحظتها..
- كتاب شو؟؟
- كتاب إستقالتي من هالشغله الماسخة والناس المعفنة اللي زي شكلك…
- لاه يازلمة ليش هيك!!
- الله يوخذك ويوخذ هالبجم اللي معك!

وطلع سعيد معصّب وظل البرغي قاعد في نص الكرسي… مشكلة سعيد إنه عصبي وغير متفهم… وما عندوا صبر… الحق على سعيد يا جماعة..

  • Share/Bookmark

5 Responses to “ليكون مش عاجبك”

  1. Qwaider قويدر Says:

    Priceless :)

  2. Abu 7amarneh Says:

    h3h3h3,,, bizzabt,,,

    - كتاب إستقالتي من هالشغله الماسخة والناس المعفنة اللي زي شكلك…
    - الله يوخذك ويوخذ هالبجم اللي معك!

    ya zalameh kalamak bi fish il 3′ol.

    thnx

  3. Lubna Says:

    lol

  4. Khalidah Says:

    LOL

    Amazing post and I could not agree more :)

  5. mkilany Says:

    LOVE it… LOL

Leave a Reply